హైదరాబాద్: తెలంగాణ అసెంబ్లీ ఎన్నికలకు ముహూర్తం ఫిక్స్ అయినట్లు తెలుస్తోంది. నాలుగు రాష్ట్రాల అసెంబ్లీ ఎన్నికలతో పాటే తెలంగాణకూ
ఎన్నికలు జరిపించాలని ఎలక్షన్ కమిషన్ నిర్ణయించుకున్నట్లు సమాచారం. ఈ దిశగా ఇప్పటికే ఈసీ కసరత్తు పూర్తి చేసిందని, ఈ నెల 12వ తేదీన ఎన్నికల షెడ్యూల్ వెలువరిస్తుందని, ఎన్నికలు కూడా నవంబర్ నెలలోనే జరగొచ్చని తెలుస్తోంది.
ఇప్పటికే ఈవీఎంలు, వీవీప్యాట్ మెషీన్లు సిద్ధమయ్యాయని, వీటిపై ఆయా రాజకీయ పార్టీలకు అవగాహన కల్పించే కార్యక్రమాలు చేపట్టామని ఎన్నికల సంఘం సీనియర్ అధికారులు తెలిపారు.
అన్ని రాష్ట్రాల ఎన్నికలూ నవంబర్ 11 నుంచి 30 మధ్య జరుగుతాయని ఈసీ వర్గాలను ఉటంకిస్తూ వార్తలు వెలువడుతున్నాయి. మావోయిస్టుల
ప్రభావం అధికంగా ఉండే ఛత్తీస్గఢ్ మినహా మిగతా అన్ని రాష్ట్రాల్లో ఒకే రోజున పోలింగ్ జరుగుతుందని, ఐదు రోజుల వ్యవధిలో ఎన్నికలు ఉంటాయని, డిసెంబర్ తొలి వారంలోనే ఎన్నికల ఫలితాలు వెలువడతాయని అధికారులు చెబుతున్నారు.
తెలంగాణ, మిజోరం ఎన్నికలు నవంబర్ 11 నుంచి 17 మధ్య రెండు దశల్లో జరుగుతాయని, అదే నెల 18 నుంచి 24 మధ్య మధ్యప్రదేశ్, ఛత్తీస్ గఢ్.. 25 నుంచి 30 మధ్య రాజస్థాన్ లో ఎన్నికలు జరుగుతాయని తెలుస్తోంది. డిసెంబర్ 10 నాటికి అన్ని రాష్ట్రాల్లో కొత్త ప్రభుత్వాలు ఏర్పడేందుకు తమవంతు సహకారాన్ని అందించాలని భావిస్తున్నట్టు వెల్లడించారు.
