కోదాడ : నల్గొండ జిల్లా కోదాడ పట్టణ కేంద్రంగా ఆన్లైన్ వ్యభిచారం కొన్నేళ్లుగా గుట్టుచప్పుడు కాకుండా సాగుతున్నట్లు తాజాగా ఆరోపణలు వినిపిస్తున్నాయి. పట్టణంలోని కట్టకొమ్ముగూడెం రోడ్డులో ఈ ముఠా తమ కార్యకలాపాలను సాగిస్తున్నట్టు తెలియవస్తుంది.
వీరు తమకు అంది వచ్చిన సాంకేతిక విజ్ఞానాన్ని అనుకూలంగా మార్చుకుని యథేచ్ఛగా దందా సాగిస్తున్నారని సమాచారం. ఆంధ్రప్రదేశ్లోని గుంటూరు, విజయవాడ తదితర పట్టణాల నుంచి అమ్మాయిలను తీసుకొచ్చి ఈ చీకటి వ్యాపారం కొనసాగిస్తున్నట్లు పోలీసులు గుర్తించారు.
దీనిపై నిఘా పెట్టిన పోలీసులు శనివారం దాడి చేసి దాని నిర్వాహకులను అదుపులోకి తీసుకున్నారు. వారిని కోర్టుకు రిమాండ్ చెయ్యడంతో పాటు బాలికలను నల్గొండ రెస్క్యూ హోంకు తరలించారు.
నిర్వాహకుల నుండి స్వాధీనం చేసుకున్న మొబైల్ ఫోన్లను పోలీసులు తనిఖీ చేయగా ప్రముఖుల ఫోన్ నంబర్లు ఉన్నట్టు కోదాడలో పుకార్లు షికార్లు చేస్తున్నాయి. ఇందులో వాస్తవం లేదని కొందరు కొట్టిపారేస్తుండగా మరికొందరు నిప్పులేనిదే పొగరాదని వ్యాఖ్యానిస్తున్నారు.
పోలీసు కస్టడీలో నిర్వాహకులు..
ఈ వ్యభిచార గృహ నిర్వాహకులను పోలీసులు రెండు రోజుల క్రితం అరెస్టు చేశారు. వారిని రిమాండ్కు పంపి మళ్ళీ కోదాడ పోలీసులు తిరిగి తమ కస్టడీకి తీసుకున్నారని సమాచారం. వారి నుంచి పూర్తి వివరాలను రాబట్టి ఈ సెక్స్రాకెట్కు చెక్ పెట్టాలని కోదాడ పోలీసులు భావిస్తున్నట్లు తెలుస్తోంది.
వచ్చే రెండు మూడు రోజుల్లో ఉన్నతాధికారులతో మీడియా సమావేశం ఏర్పాటు చేసి పూర్తి వివరాలు వెల్లడించే అవకాశం ఉన్నట్లు సమాచారం.
విటుల్లో పట్టణ ప్రముఖులు..?
నిర్వాహకుల వద్ద లభించిన మొబైల్ ఫోన్ ఇప్పుడు ఈ కేసులో చాలా కీలకంగా మారినట్లు తెలుస్తోంది. దానిలో ఉన్న నంబర్లు, వారితో తరచూ మాట్లాడిన వారి నంబర్లు పోలీసుల చేతికి చిక్కినట్లు సమాచారం. దీనిపై పూర్తి వివరాలు తెలుసుకునే పనిలో పట్టణ పోలీసులు ఉన్నారు.
ఈ క్రమంలోనే పట్టణానికి చెందిన కొందరు వ్యాపారులు, రాజకీయ నాయకులు, ప్రభ్వుత ఉద్యోగులు, పత్రికా విలేకరులు, ఇంకా పలువురు ఈ జాబితాలో ఉన్నారని సమాచారం. వీరు తమ పేర్లు బయటకు రాకుండా పోలీసులను కాకా పడుతూ, వారిపై ప్రభుత్వ పెద్దల ద్వారా ఒత్తిడి తెస్తున్నారని ఇక్కడ జోరుగా ప్రచారం జరుగుతుంది.
ఈ వ్యవహరం మా దృష్టికి వచ్చింది: శ్రీనివాసులరెడ్డి, పట్టణ సీఐ
కోదాడలోని కట్టకొమ్ముగూడెం రోడ్డులో నిందితులను అదుపులోకి తీసుకుని రిమాండ్కు తరలించాం. కానీ మా వద్ద వాట్సప్లో కొంత మంది ప్రముఖుల వివరాలు ఉన్నట్లు వదంతులు వచ్చాయి. కానీ వాస్తవంగా అలాంటి సమాచారమేమీ లేదు. జరుగుతున్న ప్రచారంపై కూడా విచారణ చేస్తాం. ఏదైనా సమాచారం ఉంటే వెల్లడిస్తామని పట్టణ సీఐ శ్రీనివాసులరెడ్డి తెలిపారు.
