ఆంధ్రప్రదేశ్ లో ఎన్నికలకి మరి కొన్ని నెలల సమయం మాత్రమే ఉండటంతో , వచ్చే సార్వత్రిక ఎన్నికల్లో తప్పనిసరిగా విజయం సాధించి, అధికారం చెపట్టాలని కృతనిశ్చయంతో ఉన్న వైసీపీ అధినేత జగన్మోహన్ రెడ్డి ప్రచారానికి సమరశంఖారావం పూరించాడు. సమరశంఖారావం పేరుతో అన్ని ఏపీ వ్యాప్తంగా జిల్లాల్లోనూ సభలను నిర్వహించనున్నారు.
తిరుపతి నుంచే ప్రారంభం…
పార్టీకి చెందిన ప్రతినిధులతోనే ఈ సమావేశాలు నిర్వహిస్తున్నా, ఎన్నికల ప్రచారంగానే ఇవి కొనసాగనున్నాయని వైసీపీ వర్గాలు అంటున్నాయి. వైసీపీ సమరశంఖారావం తిరుపతి నుంచే ప్రారంభం కానుంది. చిత్తూరు జిల్లా సమావేశం బుధవారం తిరుపతిలో నిర్వహించనున్నారు. ఈ సమావేశానికి సుమారు 40 వేల మంది హాజరవుతారని ఆ పార్టీ సీనియర్‌ నేత ఒకరు తెలిపారు.
ప్రతీ నియోజకవర్గం నుంచి కనీసం 2500 మంది చొప్పున బూత్‌ కమిటీల ప్రతినిధులు, కార్యకర్తలు సమావేశానికి హాజరకానున్నట్టు ఆయన పేర్కొన్నారు. వీరందరినీ ఎన్నికలకు సన్నద్ధం చేయడం, పార్టీ హామీల గురించి చర్చించడం, ఎన్నికల ప్రక్రియలో కార్యకర్తలు, బూత్‌కమిటీల ప్రతినిధులు అమలు చేయాల్సిన వ్యూహాలను జగన్ వివరిస్తారు. ఫిబ్రవరి 7న కడప, ఫిబ్రవరి 11న అనంతపురం, ఫిబ్రవరి 13న ప్రకాశం జిల్లాల్లో జరిగే సభల్లో ఆయన పాల్గొననున్నారు.
తిరుపతిలోని యోగానంద్‌ ఇంజినీరింగ్‌ కళాశాల సమీపంలో జరిగే ఈ సదస్సుకు ఏర్పాట్లు పూర్తయ్యాయి. ఉదయం 11.30 గంటలకు రేణిగుంట విమానాశ్రయానికి వైసీపీ అధినేత జగన్, చేరుకుని అక్కడ నుంచి మధ్యాహ్నం 12 గంటలకు తిరుపతి రూరల్‌ మండలం తనపల్లి క్రాస్‌రోడ్డు దగ్గర్లోని పీఎల్‌ఆర్‌ గార్డెన్స్‌లో జరిగే తటస్థుల సదస్సులో పాల్గొంటారు.
ఆ తరువాత మధ్యాహం 1 గంటకు సమర శంఖారావం సభకు హాజరవుతారు. వచ్చే ఎన్నికల్లో పార్టీ శ్రేణులను సమాయత్తం చేయడమే లక్ష్యంగా సమర శంఖారావం సదస్సును నిర్వహిస్తున్నామని పార్టీ నేత బొత్స సత్యనారాయణ తెలిపారు.
చదవండి : కేంద్ర ఎన్నికల సంఘానికి జగన్ ఫిర్యాదు !
