అమరావతి: వైఎస్సార్ కాంగ్రెస్ పార్టీలో కీలక నేతగా వ్యవహరిస్తున్న రాజ్యసభ ఎంపీ విజయసాయిరెడ్డికి..మరో కీలక పదవి దక్కింది. పార్లమెంటరీ పార్టీ నేతగా విజయసాయిరెడ్డిని నియమిస్తూ ఆ పార్టీ నిర్ణయం తీసుకుంది.
అటు లోక్‌సభలో వైసీపీ పక్ష నేతగా రాజంపేట ఎంపీ మిథున్ రెడ్డి వ్యవహరించనున్నారు. ఇక పార్టీ చీఫ్ విప్‌గా రాజమండ్రి ఎంపీ మార్గాని భరత్ బాధ్యతలు నిర్వర్తించనున్నారు.
ఇదిలా ఉంటే ఈ నెల 12న ఏపీ శాసనసభ సమావేశాలు జరగనున్నాయి. ఈ సమావేశాల్లో ప్రొటెం స్పీకర్ ఎమ్మెల్యేలతో ప్రమాణ స్వీకారం చేయించనున్నారు. అయితే ప్రొటెం స్పీకర్‌గా చిన్న అప్పలనాయుడును నియమించే అవకాశం ఉన్నట్లు తెలుస్తోంది.
ఇక ఈ నెల 8న కొత్త మంత్రివర్గం ప్రమాణస్వీకారం చేయనుంది. అనంతరం పదో తేదీన రాష్ట్ర కేబినెట్‌ తొలి సమావేశం జరుగుతుంది. ఆ సందర్భంగా అసెంబ్లీ సమావేశాల తేదీలను ఖరారుచేస్తారు. ఈ నెల 12 నుంచి ఐదు రోజుల పాటు సమావేశాలు నిర్వహించాలని జగన్‌ ప్రాథమికంగా నిర్ణయించారు.
