ఐదేళ్లు గాడిదలు కాశారా?: చంద్రబాబుపై విరుచుకుపడిన వైఎస్ షర్మిల!

హైదరాబాద్: ఏపీలో ఎన్నికల సమయాన విమర్శల హోరు పెరిగిపోతోంది. తాజాగా ప్రతిపక్ష నేత, వైసీపీ అధినేత జగన్ సోదరి వైఎస్ షర్మిల సీఎం చంద్రబాబుపై తీవ్ర స్థాయిలో విరుచుకుపడ్డారు. చంద్రబాబు నాయుడు హయాంలో రాష్ట్రంలో అభివృద్ధి 25 ఏళ్లు వెనక్కి వెళ్లిందని వ్యాఖ్యానించారు. 

సోమవారం షర్మిల విలేకరులతో మాట్లాడుతూ చంద్రబాబుపై ప్రశ్నల వర్షం కురిపించారు. చంద్రబాబు పాలనలో భూతద్దం పెట్టుకుని వెతికినా అభివృద్ధి జాడే కనిపించడం లేదని విమర్శించారు. వైఎస్సార్‌ పాలనలో రైతులకు గిట్టుబాటు ధర ఉండేదని, అలాగే పేద విద్యార్థులు కూడా పెద్ద చదువులు చదువుకునేవారని ఈ సందర్భంగా గుర్తు చేశారు.

నేనొక సామాన్యురాలిగా మాట్లాడుతున్నా…

‘‘నేను వైఎస్సార్‌ కూతురుగా కాకుండా సామాన్యురాలిగా మాట్లాడుతున్నా.. భూత‌ద్దం పెట్టుకుని వెతికినా రాష్ట్రంలో ఎక్క‌డా అభివృద్ధి క‌నిపించ‌డం లేదు. మ‌హానేత వైఎస్సాఆర్ హ‌యాంలో పేద కుటుంబం సంతోషంగా ఉండేది. రైతు కుటుంబం ధైర్యంగా ఉండేది. పంట‌కు గిట్టుబాటు ధ‌ర ఉండేది. ప్ర‌తి వ్య‌క్తికి ఉపాధి ఉండేది…’’ అని షర్మిల తెలిపారు.

‘‘పవన్ కళ్యాణ్ యాక్టర్, యాక్టర్ డైరెక్టర్ చెప్పినట్టు చేయాలి. ప్రస్తుతం ఆయన అదే చేస్తున్నాడు. చంద్రబాబు డైరెక్టర్‌ కాబట్టే …. డైరెక్టర్ చెప్పినట్టు పవన్ చేస్తున్నాడు. పవన్ నామినేషన్‌కి పచ్చ పార్టీ క్యాడర్ ఉంటుంది. పైకి మాత్రం పొత్తులు లేవని చెబుతూ.. లోపల కుమ్మక్కు రాజకీయాలు చేస్తుంటారు. పవన్‌కు ఓటు వేస్తే చంద్రబాబుకు ఓటు వేసినట్టే. జనసేన పార్టీకి ఓటు వేస్తే తెలుగుదేశం పార్టీకి ఓటు వేసినట్లే..’’ అని షర్మిల వ్యాఖ్యానించారు. 

‘‘మా చిన్నాన్న వైఎస్‌ వివేకానందరెడ్డి హత్యను కూడా రాజకీయం చేస్తున్నారు. కుటుంబ పెద్దను ఎవరైనా చంపుకుంటారా?.. మీ ఫ్యామిలీలో గొడవలు ఉంటే హత్యలు చేసుకుంటున్నారా? మేం బాధితులం, అయినా మాపై ఆరోపణలు చేస్తున్నారు. చంద్రబాబు ముఖ్యమంత్రిగా ఉన్నప్పుడే మా కుటుంబ సభ్యుల హత్యలు జరిగాయి. చంద్రబాబుకు దమ్ముంటే థర్డ్ పార్టీ విచారణకి సిద్ధపడాలి..’’ అని వైఎస్‌ షర్మిల సవాల్‌ విసిరారు.