ప్రపంచకప్‌లో బోణి కొట్టిన శ్రీలంక!

ఇంగ్లాండ్: ఇంగ్లాండ్ వేదికగా జరుగుతున్న వన్డే ప్రపంచకప్ 2019లో శ్రీలంక జట్టు విజయంతో పుంజుకుంది. అఫ్గానిస్థాన్‌తో కార్డిఫ్ వేదికగా మంగళవారం రాత్రి ముగిసిన మ్యాచ్‌లో బ్యాటింగ్‌లో విఫలమైనా.. బౌలింగ్‌లో రాణించిన శ్రీలంక జట్టు 34 పరుగుల తేడాతో అలవోక విజయాన్ని అందుకుంది.

వర్షం కారణంగా మ్యాచ్‌ని 41 ఓవర్లకి కుదించగా, టాస్ ఓడి తొలుత బ్యాటింగ్ చేసిన శ్రీలంక జట్టు.. 36.5 ఓవర్లలో 201 పరుగులకి ఆలౌటైంది. ఆ జట్టులో కుశాల్ పెరీరా అర్ధశతకంతో సత్తాచాటాడు. వర్షం కారణంగా ఓవర్లతో పాటు అఫ్గానిస్థాన్ లక్ష్యాన్ని కూడా 187 పరుగులకి కుదించారు. కానీ ఛేదన ఆరంభం నుంచి తడబడిన ఆ జట్టు ఏ దశలోనూ గెలిచే దిశగా అడుగులు వేయలేకపోయింది.

ఓపెనర్ షెహజాద్ (7) మరోసారి పేలవ ప్రదర్శనతో నిరాశపరచగా రహ్మత్ షా (2), హస్మతుల్లా (4), మహ్మద్ నబీ (11) ఇలా వచ్చి అలా వెళ్లిపోయారు. మధ్యలో హజ్రతుల్లా 30 , గుల్బుద్దీన్ 23 కాసేపు వికెట్ల పతనాన్ని అడ్డుకోగా నజీబుల్లా (43: 56 బంతుల్లో 6×4) గొప్పగా పోరాడాడు. కానీ.. ఆఖర్లో మలింగ ధాటికి వరుసగా వికెట్లు చేజార్చుకున్న ఆ జట్టు 32.4 ఓవర్లలో 152 పరుగులకే ఆలౌటైంది. శ్రీలంక జట్టులో నువాన్ ప్రదీప్ నాలుగు వికెట్లు తీయగా.. మలింగ మూడు, ఇసురు ఉదాన, తిసార పెరీరా చెరో వికెట్ తీశారు.

అంతకముందు టాస్ గెలిచిన అఫ్గానిస్థాన్ కెప్టెన్ గుల్బుద్దీన్ ఫీల్డింగ్ ఎంచుకున్నాడు. దీంతో.. మొదట బ్యాటింగ్ ఆరంభించిన శ్రీలంకకి ఓపెనర్లు కుశాల్ పెరీరా (78: 81 బంతుల్లో 8×4), కరుణరత్నె (30: 45 బంతుల్లో 3×4) తొలి వికెట్‌కి 92 పరుగుల భాగస్వామ్యంతో శుభారంభమిచ్చారు.

కానీ.. ఇన్నింగ్స్ 14వ ఓవర్‌లో కరుణరత్నెని ఔట్ చేసిన మహ్మద్ నబీ.. ఆ తర్వాత ఒకే ఓవర్‌లో తిరుమానె (25), కుశాల్ మెండిస్ (2), ఏంజిలో మాథ్యూస్ (0)‌లను పెవిలియన్ బాట పట్టించేశాడు. ఆ వెంటనే తిసార పెరీరా (2) కూడా లేని పరుగు కోసం ప్రయత్నిస్తూ రనౌటవడంతో శ్రీలంక జట్టు ఒక్కసారిగా 149/5తో ఒత్తిడిలో పడిపోయింది.

ఒక ఎండ్‌లో వికెట్లు పడుతున్నా.. ఓపికగా క్రీజులో నిలిచిన ఓపెనర్ కుశాల్ పెరీరా.. టీమ్‌కి మెరుగైన స్కోరు అందించేలా కనిపించాడు. అయితే జట్టు స్కోరు 180 వద్ద అతడ్ని రషీద్ ఖాన్ బోల్తా కొట్టించడంతో శ్రీలంక కోలుకోలేకపోయింది. శ్రీలంక జట్టు 33 ఓవర్లు ముగిసే సమయానికి 182/8తో నిలిచిన దశలో వర్షం రావడంతో మ్యాచ్‌ నిలిచిపోగా.. అనంతరం ఆరంభమైన నాలుగు ఓవర్లలోనే ఆ జట్టు ఆలౌటవడం విశేషం. అఫ్గానిస్థాన్ బౌలర్లలో మహ్మద్ నబీ నాలుగు వికెట్లు తీయగా.. రషీద్ ఖాన్, జర్దాన్ తలో రెండు వికెట్లు తీశారు.