అమరావతి: గుంటూరుకు చెందిన బోరుగడ్డ అనిల్ కుమార్ తన భార్యతో కలిసి తాడేపల్లిలోని వైసీపీ అధినేత, మాజీ సీఎం వైఎస్ జగన్ మోహన్ రెడ్డి నివాసం వద్ద మంగళవారం నిరసనకు దిగడం రాజకీయ వర్గాల్లో తీవ్ర కలకలం రేపింది.
గతంలో తనను వైసీపీ నేతగా చెప్పుకున్న అనిల్తో పార్టీకి ఎలాంటి సంబంధం లేదని ఆ పార్టీ ఇప్పటికే పలుమార్లు స్పష్టత ఇచ్చినప్పటికీ, ఆయన నేరుగా జగన్ నివాసానికి చేరుకోవడం చర్చనీయాంశమైంది.
ఈ సందర్భంగా వైసీపీ సీనియర్ నేత, జగన్ ముఖ్య అనుచరుడైన సజ్జల రామకృష్ణారెడ్డిపై అనిల్ తీవ్రస్థాయిలో సంచలన వ్యాఖ్యలు చేశారు.
“నాపై రౌడీషీటర్ అని తప్పుడు ప్రచారం!”
తాడేపల్లిలో మీడియాతో మాట్లాడిన బోరుగడ్డ అనిల్.. జగన్ నివాసంలోకి తాను వెళ్లకుండా సజ్జల రామకృష్ణారెడ్డి తన అనుచరులతో కలిసి అడ్డుకుంటున్నారని మండిపడ్డారు. అంతేకాకుండా సజ్జల కావాలనే తనపై ‘రౌడీషీటర్’ అంటూ తప్పుడు ప్రచారం చేయిస్తున్నారని ఆగ్రహం వ్యక్తం చేశారు.
తనపై ఎలాంటి రౌడీషీట్ లేదని ఇటీవలే హైకోర్టు కూడా స్పష్టం చేసిందని గుర్తుచేసిన ఆయన, ఈ విషయంలో హైకోర్టు ఆదేశాల మేరకు 12 మంది పోలీసు అధికారులకు మెమోలు కూడా జారీ అయ్యాయని తెలిపారు.
“పీజీ పూర్తి చేశా.. జగన్ కోసం కష్టపడ్డాను”
తన నేపథ్యం గురించి చెబుతూ.. “నేను లండన్లో పీజీ పూర్తి చేసి ఇక్కడికి వచ్చాను. నా తండ్రి మరణం తర్వాత వైఎస్సార్ సమాధి (ఇడుపులపాయ) వద్ద ప్రమాణం చేసి, జగన్ను ముఖ్యమంత్రి చేయడమే లక్ష్యంగా కష్టపడి పనిచేశాను. కేంద్ర మంత్రులు సైతం స్వయంగా నా ఇంటికి వస్తుంటారు. అలాంటి నాపై నిందలు వేయడం సరికాదు” అని అనిల్ ఆవేదన వ్యక్తం చేశారు.
తనపై నిందలు వేస్తూ, జగన్ను కలవకుండా అడ్డుకుంటున్న వారిపై వైసీపీ అధినాయకత్వం తక్షణమే కఠిన చర్యలు తీసుకోవాలని ఆయన డిమాండ్ చేశారు.
